რიტორიკის თეორია და პრაქტიკა XVIII-XIX საუკუნეების საქართველოში რიტორიკის პირველი ქართულენოვანი სახელმძღვანელოების მიხედვით

ანოტაცია

საქართველოში მჭევრმეტყველების სწავლების ისტორიისთვის მნიშვნელოვანია რიტორიკის პირველი სახელმძღვანელოების განხილვა. მათ რიცხვში შედის როგორც თარგმნილი, ისე ორიგინალური ნაშრომები. პირველ ასეთ სახელმძღვანელოდ უნდა დავასახელოთ, მხითარ სებასტაცის „რიტორიკა“, რომელიც ითარგმნა სომხურიდან, დაახლოებით 1761-1764 წლებში. წიგნი თარგმნეს და გამართეს ანტონ ბაგრატიონმა, ფილიპე ყაითმაზიშვილმა და დოსითეოზ ჩერქეზიშვილმა. რიტორიკის შემდგომი სახელმძღვანელოები უკვე ორიგინალურია, მათ შორის, ცნობილია სოლომონ დოდაშვილის „რიტორიკა“ 1827-1828 წელს დაწერილი და 1879 წელს, კონსტანტინეპოლში, ანთუან გვიზალიანის სტამბაში გამოცემული „მოკლე რეტორიკა გინა მჭევრმეტყველება სასარგებლოდ ახალ გაზდა ყმაწვილ კაცთა“.